மழை

வெளிச்சம் சுற்றி 

இறகடித்து கவிழ்ந்தன

ஈசல்கள்

குளிர் தென்றல் 

அனுப்பி

கால தாமதம் செய்கிறது

நட்சத்திரங்கள் தூங்க வைத்து வரும்

#மழை

வானவில் பிரியம்

உனக்கான காத்திருப்பின் 

கோபத்தில்

கவனித்து பார்

அடியோரம் ஒட்டியிருக்கும்

#முத்தமழை கிளறும்

வானவில் பிரியம்

ஆதி ரிஷிமூலம்

நதியோடி நிகண்ட நிலத்தில் 

இறகு விரித்த வலசை ஒன்று 

இறக்குமதி செய்த கழிவில்

பழமுத்திய பெருவிதை கழன்று 

மண்நுழைந்து போராடி

வேர் கிளைத்து விருட்சமாக

இலைபரப்பிய

மணங்கண்டு மனதிசைந்த

மகிழ்சோடிகள் இயைபு கண்டு

இனம்பெருக்க...

வெடித்திட்ட வேர்முண்டுகள்

வெயில் உண்டு வெப்ப ஏப்பமிட்ட

பெருமூச்சை ....

ஏந்தித் தாங்கிய முகிலது

கருமையடைந்து கற்பு தவற

வான்கூட்டிய பஞ்சாயத்தில்

பகல்திருடன் தப்பிக்க 

மூலை தேடி அழ நகர்ந்த முகில்

கூர்தீட்டிய முகட்டு மலை குத்தி

தீராக் கண்ணீர் வடிக்க

குழைதல் ப்ரியம் கண்டது

உருண்டு திரண்ட அண்ட விண்கல் 

ஏழ்பிறப்பிற்கும்

என் வாழ்தல்இடம் நீயென

நிர்ணயிக்கிறது

#ஆதி ரிஷிமூலம்

மழை கர்ப்பம்

மதன்மயக்கம் தரும் 

மழை கர்ப்பம் 

தாங்கிய.....

மேகப்பொழுது

தொடர் மழை

உள் தணல்

தூண்டி 

உன் தாகம் கனற்றும்

வெளி கொட்டும் 

தொடர் மழை

இரவுமழை

மின்னல் கண்ணடிக்க

அமைதிக் கண்ணீராய்

அடம்பிடித்து

குளம் கட்டுகிறது

#இரவுமழை

பரிதாபத்தில் பாதசாரிகள்

வராது வந்தணைத்த

மழையை 

இயைபு கொஞ்சி

இருப்பவர்கள் குளிர்காய 

படுக்குமிடம் பறிபோன 

பரிதாபத்தில் 

பாதசாரிகள்

நன்மை மழை

நன்மை மழையும் 

#கெடுக்கிறது

நாடோடிகள் வாழ்வை

சாளர மழைத்துளி யாய்

சாளர மழைத்துளி யாய்

வழியும் மனம்

நினைவு அனலாய்

நிகழ்வு குளிர்ந்து

நீயில்லாமல்

மாக் கள் அறிவதில்லை

மரம் வெட்டும்
மாக் கள்
அறிவதில்லை

மழையை
வேரறுக்கிறோமென

நித்திலச்சரமாய்

சோ வென கொட்டியமழை
சோடி போட்டு
தேங்கி தொங்கியது

சிலந்தி வீட்டில்

நித்திலச்சரமாய்

கையில் பூக்குடையுடன்.!!

கைகால் வீசி

தெரு நடை போட்டு
விளையாட

அழைக்கிறது
பிள்ளை மழை

கடைக்கு போவதாய்
சொல்லி அம்மா
ஏமாற்றி வருகிறேன்

கவனமாய்
கையில் பூக்குடையுடன்.!!!

இனப்பெருக்க மழை

ஆறுகுளங்களை
நிரப்ப வந்து

தெருக்களில்
தளும்பி வழிந்தே

தன் இருப்பிடங்களை
தேடுகிறது

வல்லரசின்
வறுமை சிக்கும்

இனப்பெருக்க மழை

எதிர்ப்பு குடையுடனே

எதிர்ப்பு குடையுடனே
வரவேற்கிறோம்

எதிர்பார்த்து
ஏங்கி கிடந்த மழையை

மழை மலர்

இலை முதல்
இதழ் வரை

முத்தமிட்டு
மயக்கிய

இரவுக் கள்ளனை

ஈர சாட்சியேந்தியே
நித்தம் பகல்

நீதி கேட்கிறது

மழை மலர்

ஈரமாகிறேன் நான்

நனைகிறாய் நீ

ஈரமாகிறேன்
நான்..

மழைத்துளி மழலை

சட்டென சந்தோசம்
பூக்க வைக்கிறது

ஜன்னலோரம்
பயணிக்கும்

மழைத்துளி மழலை

நம்பிக்கையாய்

பல யாகம் நடத்தி
வராத மழை

கொட்டோ கொட்டென்று
கொட்டியது

நம்பிக்கையாய்
குழந்தை
குடை விரிக்க

மலைபொலிவுகள்

உன்
மழை பொழிவில்

மெருகேறும்

என்
மலைபொலிவுகள்

முத்த மழை

தாகம் நீ தருவாய்
என்றே

தாப மொழி
சொல்கிறதடி

பட்டு உன் மேனி மேல்
பட்டுத் தெறிக்கும்

முத்த மழை